negull.net - kryddið í tilveruna

Öskudagurinn

2012-02-22T21:33:00.000Z

Samtvinnaðar.

Systurnar sætu smeygðu sér í búninga í morgun, Hildigunnur fór í þjóðbúning drengja, vesti og buxur af bróður sínum og var bara nokkuð sátt með það, Matthildur er hins vegar enn á prinsessubúningaskeiðinu og fór í rauðum síðkjól og spariskóm á Ós. Í Austurbæjarskóla var farið í skrúðgöngu og sleginn köttur úr tunnu og fleira, og Hildigunni fannst þetta skemmtilegur dagur, "en þreytandi"og var hálf-lúin eftir allt saman. Við gleymdum alveg að taka myndir, alger skandall, en hér er nú samt mynd af þeim. Hinar hressustu bara.

Fornt hnoð

2012-02-21T22:05:00.000Z

Prestsins kona er fjörug frú

Við gáfum stúlkunum í jólagjöf bókina Dans vil ég heyra, í henni eru gamlar vísur og sagnadansar. Henni fylgir geisladiskur með gömlum upptökum úr Árnasafni þar sem má heyra nokkur gamalmenni kveða vísurnar, dálítið brostnar raddirnar sumar. Þeim systrunum leist nú ekkert á þetta í fyrstu og eiginlega bara hundleiðinlegt væl. Eitt kvæðið fannst þeim samt pínku skemmtilegt og kveiktu þar fyrst á myndunum, en Óskar Jónasson myndskreytir kvæðin mjög skemmtilega. Svo fór þetta nú bara að síast inn og þær hlusta oft á þetta á kvöldin áður en þær fara að sofa. Svona eru þær nú fornar í anda. Og það merkilega er hvað þetta raul hefur róandi áhrif á þær, það dettur bara allt í dúnalogn og þær eru sofnaðar fyrr en varir.

Veggskreyti

2012-02-20T22:29:00.000Z

Hér er norræni andinn í fyrirrúmi.

Ég held að það væri góð hugmynd af fá einhvern lit/munstur/mynd á veggpart í stofunni – svona til að "afmarka rýmið", sko – en úrvalið er endalaust. Á að mála og þá í hvaða lit? Veggfóður og hvaða munstur? Sumir ná sér í stóran striga og mála með uppáhaldslitnum – alltaf hægt að skipta um. Og hver nennir að skoða í öllum búðunum? En ég er þó með ákveðna hugmynd í kollinum og ef ég þekki mig rétt mun hún kannski verða að veruleika með haustinu. Best að segja þó ekki hvaða haust.

Fjölskyldan

2012-02-15T22:32:00.000Z

Njálsgötuslektið.

Hildigunnur riggaði upp þessari mynd af fjölskyldunni um daginn. Og hafði húsið okkar með en henni fannst reyndar flottara að hafa það bleikt.

Myndlíkindi

2012-02-03T22:03:00.000Z

Óneitanlega nokkur líkindi með þessum myndum, önnur er ljósmynd af Grétari föðurbróður úti á sjó fyrir margt löngu, hin málverk eftir Gunnlaug Scheving, "Golþorskur" sem verður einmitt boðið upp á mánudaginn kemur, verð í kringum hálfa millu.

Alfa og omega

2012-01-30T19:01:00.000Z

Þórarinn og Örlygur komust ekki á listann.

Hin árlega janúarfreisting er bókaútsölurnar. Þó að ég hafi tekið ástfóstri við kyndilinn minn og muni sjálfsagt ekki kaupa skáldsögu á pappír meir, eru listaverka- og innanhúss"dekkó"bækurnar eitthvað sem maður setur ekki í svarthvítt lesbretti. Ég náði mér í þessa fínu uppflettibók, tæplega 400 listamenn listaðir, allt frá fægistíl og hlaðstíl til gnæfu og klumbustíls. Nú verð ég viðræðuhæf við listfræðinga.

Kolgeit

2012-01-24T20:47:00.000Z

Systraknús

Knús eða knyttur?

Þessar stúlkur fóru til tannlæknis um daginn og eins og sjá er ekkert upp á tannheilsuna að klaga, enda voru þær leystar út með góðum verðlaunum. Kannski hefði maður verið duglegri að bursta í den ef maður hefði átt von á verðlaunum, þá væri ekki silfurberg að sjá í munni.

Sushi Quatro

2012-01-19T22:35:00.000Z

Árangurinn var glæsilegur.

Ég fékk í jólagjöf margt fallegt og fínt en eina gjöfina leysti ég út nú í fyrradag. Grétar bauð mér á sushi-námskeið sem var haldið eina kvöldstund lengst upp í Árbæ. Halli veitti pössunarþjónustu á meðan ("hann var alltaf að grínast", sögðu stúlkurnar kátar daginn eftir). Á námskeiðinu voru sirka tuttugu manns, allir fengu hníf í hendur, grænmeti og fisk til að skera, grjón og allt tilheyrandi og við lærðum að gera tvær tegundir af rúllum og fengum meira að segja smá tilsögn í að halda á prjónum. Sushimeistarinn kunni sitt fag og lumaði á ýmsum góðum ráðum en var hins vegar ekki mjög vel máli farinn ("ef maður sé með sushi-veislu"). Það dró líka úr færni minni með hnífinn hversu kalt var í salnum. En þetta var mjög skemmtilegt og fróðlegt og það sem óx manni í augum er nú leikur einn!

Nýtt ár

2012-01-01T20:44:00.000Z

Algert tímamótaverk. Ég meinaða.

Nýtt ár hafið og vonandi kveðjum við fljótlega pestina sem á okkur hefur herjað að undanförnu (ég er ekki að tala um forsetann heldur flensuna hér á heimilinu). Ég sló líka striki undir mína fínu meistararitgerð sem ég á að skila fyrir 6. janúar og er þar með laus við allt skólastúss að eilífu. Það verður alveg nóg að fara yfir heimalærdóminn með Hildigunni og Matthildi næstu árin. Bless gamla ár, velkomið nýtt ár með fullt af fríum kvöldum.

Jólajólajól

2011-12-26T16:31:00.000Z

Nýir kjólar og ný skegg!

Þetta eru búin að vera hin bestu jól en heilsan hefði mátt vera betri, Hildigunnur er svona að skríða upp á við eftir hita og hóstaköst en Matthildur er tekin við. Þær nutu samt jólanna vel og jólafríið endist varla til að leika með allt nýja dótið og máta öll nýju fötin.

Hin árlega jólasúpa

2011-12-17T21:38:00.001Z

Það er orðin föst hefð hér á Njálsgötunni að bjóða fjölskyldu og vinum uppá súpu stuttu fyrir jól. Þetta hefur tvíþættan tilgang; annars vegar (og það sem mestu skiptir náttúrlega) er að sjá framan í fólkið því það eru jú allir á sífelldum þönum á þessum tíma. Hins vegar að hvetja til þess að fólk geri sér ferð í miðborgina og upplifi jólastemminguna þar sem hjarta borgarinnar slær. Það er því tilvalið í rölta í bæinn og koma við á Njálsgötunni og fá staðgóða og (vonandi) bragðgóða súpu.
Á morgun (sunnudag) rennur jólasúpudagurinn upp. Uppúr kl. 15:00 ætti súpan að vera tilbúinn og verður í boði fram eftir degi, jafnvel fram á kvöld. Fólk getur því bara litið við þegar því hentar. Vonumst til að sjá sem flesta.

Kakó í fjósi

2011-12-11T20:36:00.000Z

Ekta heitt súkkulaði í boðinu

Bíllinn bilaði fyrir helgi, nýkominn af verkstæði (!) svo við misstum af Ós-jólatrésferðinni í gær. Við bættum það þó upp í dag, fengum jeppann hennar Elsu, mömmu Grétars, lánaðan og vorum því rétt búin fyrir fannfergið í Hafnarfirði, hvert við héldum. Hjá Skógrækt Hafnarfjarðar er hægt að kaupa fallegar furur sem koma reyndar austur af Héraði – sem er dálítið furðulegt en þó viðeigandi, fyrir okkur að minnsta kosti, Hafnfirðinginn og Héraðsbúann.
Við keyptum okkur passlega stórt tré og fengum svo kakó og smákökur inn í "fjósi", gömlum bjálkakofa sem einu sinni var notaður sem skólastofa fyrir unglinga í Öldó. Meðal annars má sjá þar fornt veggjakrot (það var ekki ég sem skrifaði þetta, örugglega Ellý og pönkararnir...), þar sem segir einfaldlega: "Egó æði".

Af bakstri II

2011-12-10T19:40:00.000Z

Síðkúbisminn er alltaf vinsæll.

Þetta er ekki bara spurning um bragð heldur list.

Af jólatrjám og bakstri

2011-12-08T21:40:00.000Z

Rétta jólatréð er vandfundið

Bara svo fólk geti farið að undirbúa sig þá er verið að hnoða deigið í appelsínusmákökurnar en það þarf síðan að "taka sig" í kæli í sólarhring eða svo. Þær verða að vera tilbúnar fyrir laugardag því þá förum við, ásamt Ósurum öllum, upp í skógrækt og veljum gott jólatré handa Ósi. Notum auðvitað tækifærið og náum okkur í lífrænt, íslenskt grenitré í leiðinni - enga útlenska hríslu sem flutt hefur verið hingað með ærnum tilkostnaði og ótal skítugum vistsporum. Síðan verður drukkið heitt kakó og smákökur maulaðar í skóginum.

Aðventa

2011-12-04T13:42:00.000Z

Púrtvín - tékk.
Konfekt - tékk.
Ný Mad men sería - tékk.

Aðventan verður sælutíð.

Hleraðu þetta

2011-11-29T20:56:00.000Z

Það er svalt við turnana tvo.

Í haust byrjuðum við Grétar að horfa á The Wire, hina margrómuðu sjónvarpsþáttaröð um undirheima Baltimore. Fyrsta serían var sýnd 2002 og við erum því aðeins 9 árum á eftir áætlun. Við kláruðum að horfa á hana um helgina og erum alveg sammála Jóni Gnarr, þetta er alvörustöff. Leikurinn er fyrsta flokks, þetta eru allt svo trúverðugar, breyskar persónur, allar fastar á sinn hátt í viðjum umverfis síns, hvort sem það er stöðubaráttan innan lögreglunnar, harður gangsteraheimur eða hvað. Þá er bara að vinda sér í næsta þátt og með þessu framhaldi verðum við búin með allar seríurnar fimm um jólaleytið 2013. Most def, nigger.

Kyndillinn og greifinn

2011-11-24T20:55:00.000Z

Framhaldssagan í Fjallkonunni um aldamótin 1900,
Makt myrkranna eftir Stoker&Valdimar.

Ég er afskaplega ánægð með kyndilinn minn nýja, þ.e. Kindle lestölvuna. Gott að lesa á skjáinn og fer vel í hendi, ótrúlega fljótlegt og einfalt að hlaða niður bókum/textum á hann og snilld að geta flett upp um leið í orðabókum. Það er auðvitað enn lítið til af íslensku efni. Við erum rétt að kynnast og ég er þegar búin að setja inn á hann nokkur klassísk verk sem fást frítt á netinu, sýnishorn úr nýju Murakami-bókinni og komin í kynningaráskrift að TLS. Núna er ég að lesa Drakúla eftir Bram Stoker, hvurja ég hef aldrei lesið og kíki á íslensku þýðinguna frá 1900 til samanburðar. Virðist reyndar ekki vera sama bókin á köflum en báðar útgáfur æsispennandi og greifinn ekkert lamb að leika sér við, þar fer úlfur í engri gæru. Ef myndin prentast vel má hér lesa um hið hræfuglslega útlit Drakúlitz.

Rökræður

2011-11-20T12:05:00.000Z

Stúlkan með drekatattúið

Um daginn var Hildigunni boðið í afmæli eftir skóla í Ævintýralandi í Kringlunni. Við vorum að ræða þetta við kvöldmatarborðið og að við þyrftum að sækja Hildigunni og keyra hana svo í Kringluna. Matthildur hlýddi á þetta og misskildi eitthvað, hélt að enginn myndi sækja hana á Ós og að hún þyrfti barasta að koma sér sjálf í Kringluna. Að minnsta kosti sagði hún allkvíðin: "En ég tala ekki við ókunnuglega, ég kann ekki að fara þangað og ég á engan pening."
Af þriggja ára strumpi að vera er hún mjög rökföst.

Íkorni bregður sér í búð

2011-11-16T21:26:00.000Z

Í tilefni dagsins er við hæfi að bregða íslenskum eðalskáldskap á skjáinn. Menn mega giska á höfundinn ef það blasir ekki við. Þegar hér er komið sögu er íkorninn, aðalpersónan, orðinn svo svangur að maginn er eins og "tómur bréfpoki". Hann skreppur því út í búð:

"Í dyrum verslunarinnar lá nærri að hann væri troðinn undir af feiknarlegum skógarbirni í krumpuðum jakkafötum sem þrammaði út með rúllu af klósettpappír í hrömmunum. Íkornann hálfsvimaði þegar hann kom inn. Hann fékk sér kerru sem var með svo háu handfangi að hann þurfti að tylla sér á tær til að aka. Hann henti ofan í kerruna brauði, mjólk, banönum, kaffi, hnetusmjöri. Hér virtist engar ómengaðar hnetur að hafa."

"Ég er búin!"

2011-11-08T22:16:00.000Z

Platari ársins.

Þetta heyrir maður nokkuð oft, þegar Matthildur er búin á snyrtingunni snotru og þarf þjónustu snimmhendis. En í seint fyrrinótt vaknaði ég við að Matthildur gólaði þetta, alveg skýrt og greinilega. Ég paufaðist fram úr í myrkrinu en fann engan á baðherberginu. Kíkti inn í svefnherbergi og viti menn, Matthildur svaf eins og steinn í rúminu sínu og rumskaði ekki. Hrmmpfh!

Sjálfsmynd #1432

2011-11-01T21:13:00.000Z

Þær hrannast upp, sjálfsmyndirnar, þ.e. hjá Matthildi, hún er orðin liðtæk með myndavélina. Hér er ein góð.

Miðpunkturinn

2011-10-30T12:23:00.000Z

Ós. Sandkassi og kofar með.

Mitt í miðbænum er gullmolinn Ós, bæjarins besta barnaheimili. Hildigunnur er að vísu komin í skólann við hliðina en teiknaði þó þessa mynd um daginn af Ósi sem er jafnheiðgulur og myndin sýnir.

Í geitarhúsi

2011-10-28T17:39:00.000Z

Matthildur lætur sér fátt um geitur finnast.

Geiturnar í Háafelli verðskulda nú sérstaka færslu, þær eru fallegar og skynsamar skepnur (álít ég, eftir hálftíma heimsókn). Sumar ruddust áfram til að fá kjass og knús, aðrar færðu sig bara kurteislega nær og biðu þolinmóðar eftir klappi. Svo misstum við okkur alveg í geitavörunum, keyptum skinn og krem og kjöt og hvaðeina. Kjötið eigum við eftir að smakka en andlitskremið er þvílíkt undur og skinnið ofurmjúkt.

Vetrarfrí

2011-10-26T21:41:00.000Z

Við við Snorralaug. Hvað er Hildigunnur að gera?

Hildigunnur var í 5 daga vetrarfríi í Austó og nákvæmlega þá losnaði óvænt bústaður sem starfsmannafélagið á, svo við þeyttumst í Húsafell á föstudaginn var. Bústaðurinn var flennistór og flottur, potturinn góður og grillið heitt. Mikill lúxus líka að hafa uppþvottavél í bústað. Stelpurnar voru sérstaklega hrifnar af svefnloftinu og léku sér mikið þar en guggnuðu svo á því að sofa þar þegar á reyndi. Við skruppum í Reykholt, heimsóttum geitur á Háafelli en mest vorum við bara að slappa af og hafa það gott.

Alveg príma

2011-10-18T21:14:00.000Z

Ég átti mitt fjórtánda prímtöluafmæli í gær og tók því bara með stóískri ró, ilmolíubaði og alkemistatei og gluggaði í Gamlingjann, nýju metsölubókina sem þykir víst mjög fyndin. Ég er komin svo stutt að ég get ekki alveg dæmt um grínið en þetta lofar góðu. Engar kökur voru bakaðar að þessu sinni (gisp!) en hins vegar bauð Grétar mér á Sjávargrillið þar sem við snæddum lúðu með allskonar. Hún var feikigóð.